Urdu Poem By Gulzar

پھول نے ٹہنی سے اڑنے کی کوشش کی

اک طائر کا دل رکھنے کی کوشش کی

کل پھر چاند کا خنجر گھونپ کے سینے میں

رات نے میری جاں لینے کی کوشش کی

کوئی نہ کوئی رہبر رستہ کاٹ گیا

جب بھی اپنی رہ چلنے کی کوشش کی

کتنی لمبی خاموشی سے گزرا ہوں

ان سے کتنا کچھ کہنے کی کوشش کی

ایک ہی خواب نے ساری رات جگایا ہے

میں نے ہر کروٹ سونے کی کوشش کی

ایک ستارہ جلدی جلدی ڈوب گیا

میں نے جب تارے گننے کی کوشش کی

نام مرا تھا اور پتہ اپنے گھر کا

اس نے مجھ کو خط لکھنے کی کوشش کی

ایک دھوئیں کا مرغولہ سا نکلا ہے

مٹی میں جب دل بونے کی کوشش کی

phul ne Tahni se udne ki koshish ki

ek tair ka dil rakhne ki koshish ki

kal phir chand ka KHanjar ghonp ke sine mein

raat ne meri jaan lene ki koshish ki

koi na koi rahbar rasta kaT gaya

jab bhi apni rah chalne ki koshish ki

kitni lambi KHamoshi se guzra hun

un se kitna kuchh kahne ki koshish ki

ek hi KHwab ne sari raat jagaya hai

main ne har karwaT sone ki koshish ki

ek sitara jaldi jaldi Dub gaya

main ne jab tare ginne ki koshish ki

nam mera tha aur pata apne ghar ka

us ne mujh ko KHat likhne ki koshish ki

ek dhuen ka marghola sa nikla hai

miTTi mein jab dil bone ki koshish ki