Urdu Shayari By Gulzar 

پیڑ کے پتوں میں ہلچل ہے خبردار سے ہیں

شام سے تیز ہوا چلنے کے آثار سے ہیں

ناخدا دیکھ رہا ہے کہ میں گرداب میں ہوں

اور جو پل پہ کھڑے لوگ ہیں اخبار سے ہیں

چڑھتے سیلاب میں ساحل نے تو منہ ڈھانپ لیا

لوگ پانی کا کفن لینے کو تیار سے ہیں

کل تواریخ میں دفنائے گئے تھے جو لوگ

ان کے سائے ابھی دروازوں پہ بیدار سے ہیں

وقت کے تیر تو سینے پہ سنبھالے ہم نے

اور جو نیل پڑے ہیں تری گفتار سے ہیں

روح سے چھیلے ہوئے جسم جہاں بکتے ہیں

ہم کو بھی بیچ دے ہم بھی اسی بازار سے ہیں

جب سے وہ اہل سیاست میں ہوئے ہیں شامل

کچھ عدو کے ہیں تو کچھ میرے طرف دار سے ہیں

ped ke patton mein halchal hai khabar-dar se hain

sham se tez hawa chalne ke asar se hain

nakhuda dekh raha hai ki main girdab mein hun

aur jo pul pe khade log hain akhbar se hain

chadhte sailab mein sahil ne to munh dhanp liya

log pani ka kafan lene ko tayyar se hain

kal tawarikh mein dafnae gae the jo log

un ke sae abhi darwazon pe bedar se hain

waqt ke tir to sine pe sambhaale hum ne

aur jo nil pade hain teri guftar se hain

ruh se chhile hue jism jahan bikte hain

hum ko bhi bech de hum bhi usi bazar se hain

jab se wo ahl-e-siyasat mein hue hain shamil

kuchh adu ke hain to kuchh mere taraf-dar se hain